Menjëherë pas publikimit të skandalit ku është përfshirë kryetari i Gjykatës së Gjirokastrës Guximtar Boçi, ministri i Drejtësisë Ylli Manjani ka kërkuar nga KLD-ja shkarkimin e tij nga detyra e kryetarit të gjykatës dhe pezullimin si gjyqtar.
Ministri Manjani i bën thirrje prokurorisë të fillojë hetimin penal lidhur me skandalin e publikuar sot në emisionin “Stop”. Në regjistrimin audio, kryetari i gjykatës Boçi dëgjohet teksa i kërkon favore seksuale një gruaje, në këmbim të vendosjes së drejtësisë për çështjen e saj në gjykatë.
“Ministri Manjani vlerëson se:
- Ngjarja e transmetuar audio është shokuese! E papranueshme për figurën e çdo zyrtari aq me tepër gjykatës.
- I kërkoj menjëherë KLD ta shkarkojë gjyqtarin Guximtar Boci nga detyra e Kryetarit të Gjykatës si dhe ta pezullojë si gjyqtar.
- Menjëherë filloj procedurat e inspektimit për procedim disiplinor!
- Nxis prokurorinë të fillojë hetimin penal.”- thuhet në reagimin e ministrit Manjani.